كابيتر للتجارة الإلكترونية.. محمد حميدة رئيس شركة “إنجاز” يكشف أسباب و سيناريوهات” الانهيار السريع والصادم “
الله اعلم خبر .. هروب مؤسسي كابيتر ب ٣٣ مليون دولار .. ٦٦٠ مليون جنية خارج مصر ولا هروبهم من المسؤولية وبدون المبلغ .
بس فيه كام حاجه حابب اوضحها
ان طريقه الحرق في اغلب ال Startups بتكون أوقات كتير هي المشكلة الأساسية ويلجآ ليها البعض لتلميع الشركة كمقر وعدد موظفين ودا علي امل جمع تمويلات اخري وفي النهاية بيع الشركة وعمل Exit.
- Advertisement -
التوسع الغير مدروس علي امل جمع أموال لاستكمال المسيرة وعدم وجود Plan B في حالة عدم وجود تمويل لان الأغلب بيعمل حساباته انه يصرف الفلوس في ١٨ شهر ويجمع غيرها ويستمر !!
كتير جدا لما كنا نقعد مع Mentor كان يقول اصرفوا ماركيتنج اصروفوا وجيبوا موظفين انجزوا السوق هيطير .. مش في كل الحالات دا بيكون صح وال Mentors اللي بوجهك دا هو مش بيكون شايف الصورة كامله هو بيحاول يساعدك بما يري.
الصورة اللي بيتسوق ليها لريادة الاعمال في مصر انها حاجه جميله دا الوجه اللي ظاهر ولكن اللي مش ظاهر كمان كمية المشقة والتعب اللي بتوصل لبعض رواد الاعمال اللي بيشتغلوا علي منتج حقيقي انهم ممكن يشتغلوا في بعض الأيام اكتر من ٢٠ ساعه .
انا شايف ان موضوع انهم هربوا بالمبالغ دي صعب جدا لان هو استثمار مخاطر وجريء تمام ولكن المبلغ مش بيندفع مره واحده بيكون علي KPIs كمان بيكون فيه مراقبه علي المبالغ دي وكل ما بيكبر المبلغ كل ما المراقبة بتزيد .
كمان مش لازم تروح تجيب أجانب يشتغلوا وياخدوا مبالغ ضخمه في حين ان ليهم بدايل عادي فالاول والأخر هما مش هيساعدوك باي حاجه لما تقع واقعه زي دي انت اللي بتتحمل كل شيء.
الموضوع في الاخر مش بس بياثر علي المؤسسين .. دا بياثر عليهم وعلي الموظفين .. وعلي أي حد بيتعامل معاهم زي الموردين اللي اكيد ليهم فلوس .. وعلي العملاء اللي كانوا بيتعاملوا معاهم واقرب مثال هنا صيدليات #19011 اللي اتاثر بسببهم شركات الادوية اللي ليهم ملاييييين عندهم وخلاص مش هيقدروا ياخدوها .
مشكله كابيتر ممكن في اكتر من حاجه
-انهم حرقوا بشكل غير طبيعي علي امل انهم يجمعموا تمويل تاني
-حرق من تعيين موظفين وصل العدد اكثر من ٢٢٠٠ موظف
-حرق من شكل الشركه واصولها
-حرق بيع المنتجات باقل من سعر الشراء ودا عمل مشكله مع الموردين
*والحرق الأصعب هو البيع بالاجل في السوق المصري اللي يصعب تجميع المبالغ مره اخري وبيكون فيها نسبه مش بتقدر تجمعها
نصيحتي أي حد بيفكر يعمل startup خلي نيتك هي العمل الحقيقي والشغل اكتر علي منتجك مش جمع التمويلات اللي منها يبان ان الشركة شغاله وفي الحقيقة هي مش شغاله صح وهيجي يوم وتقع.
كمان انت لازم تكسب من المنتج اللي بتبيعه او من خدمتك عشان تقدر تستمر ولما يقابلك العميل اللي عايز ياخد كل حاجه ببلاش يبقي دا مش تارجتك أصلا .. وفيه بعض العملاء اللي بتوضحلها حاجه زي دي وتتفهم خصوصا في بيع الخدمات لما تقوله مش حاجه حلوه ابيعلك خدمه وتلاقيني قفلت ومتلاقيش حد يقدمهالك بنفس المستوي اللي بقدمهالك بيه وكتير بيتفهم الامر دا .
ليه قولت الكلام الكتير اللي فوق دا .. لان كتر بيحصل بسبب المنافسة اننا نلاقي بعض الشركات بتبيع باقل من نص اللي احنا بنبيع بيه وكمان بينزلوا عن سعرهم العادي اكتر من الربع ودي امثله حقيقه موجوده فلما كان حد يسألني بقولهم بالطريقة دي صعب يستمر في السوق هيصرف ازاي علي الموظفين ولا مقر ولا أي شيء في ظل الغلاء الموجود وقد حصل وبعض الشركات فعلا مش بتقدر تكمل. في الاخر ربنا ييسر للجميع
