حنان ونادرة .. فرق قدرات سيدى القاضى
لو إنت عاوز تعرف أد إيه منى ذكى ممثلة كبيرة ومينفعش تتقاس بأي حد
بص علي المقارنة دى
- Advertisement -
مقارنة قدرية حاصلة محدش خد باله منها
ظروف العرض بس هى اللى فرضتها
المقارنة بين منى ذكى فى تحت الوصايا
ونيللي كريم فى عملة نادرة
دول تقريبا المسلسلين الوحيدين اللي بتابعهم السنة دي بعد ما فقدت الأمل في الموسم الرمضانى كله
…
منى ونيللي تقريبا بيعملوا دورين متشابهين وقايمين علي نفس الإنفعالات اللي هما حنان ونادرة
ست أرملة وقعت فى ظروف خزعبلية .. وطوب الأرض بيحاربها
ولقت نفسها فى مواجهة مع أهل جوزها والناس
مواجهة خلقت شخصية جديدة لكل واحدة فيهم
قهر وعذاب بيتولد منه قوة شخصية وقدرة علي التصرف فى أحلك الظروف
…
طيب المقارنة القدرية اللي حاصلة بين الإتنين نيللي ومنى فى صالح مين؟
الحقيقة من غير كلام
منى زكى فارقة بسنين ضوئية
حنان الأرملة اللي هربانة من الإسكندرية بمركب جوزها المتوفى لدمياط مشحططانا معاها وبتخلينا ننهج من كتر إنفعالنا معاها
حنان قادرة توصل كل تفصيلة فى الشخصية فى ضوء طبعا كتابة بالمسطرة من أل دياب أساتذة الورق الموزون الواقعى
وإخراج رايق لأحمد شاكر خضير مفشهوش هيبرة ولا إستعراض بالكاميرا من بتاعة الباشمهندس محمد سامى كرم الله وجه وجعله زخرا لمحمد رمضان
…
هتلاقى في الناحية التانية نيللي كريم أو نادرة الست الأرملة اللي واقفة لعبد الجبار حماها وأبو جوزها المتوفي واللي ختضطر تصعد الجبل وتتجوز واحد من المطاريد وليلة كبيرة ساعدتك
لكن نيللي تقريبا قالولها كل ما تتزنقى زعقى فأحبالها الصوتية ياعينى راحت خالص
فهتلاقى إنفعالات مضحكة فعلا فى أفورتها وهى بتطلع الصوت من بطنها وتقول “ ياعبد الجبااااار “
وهتخليك كمشاهد بتحب إن الكاميرا تيجى علي الأشرار أحمد عيد وجمال سليمان وأحمد فهيم
أكتر من نادرة الست المقهورة اللي بتحارب الدنيا كلها .. ياحرااام
بعكس حنان فى تحت الوصايا إنت مش عاوز الكاميرا تفارق حنان وولادها ومحيطها
…
الخلاصة فى ٣ نقط
١- منى ذكى فى حتة تانية ياجماعة والله
٢ – إتفرجوا على تحت الوصاية هتلاقوا حاجة مفتخرة ومتعوب فيها
٣- منى ذكى فى حتة تانية ياجماعة والمصحف
…
أقول قولى هذا وأستغفر الله من الفرجة على أساطير محمد رمضان ومحمد سامى
