جريدة اخبارية شاملة
رئيسي فاليو

أحمد مسعود يكتب عن الجريمة الخطيرة .. مستريح العقارات

لابد من التصدي لكل من يلوث القطاع العقاري

المستريح ظاهرة إجرامية انتشرت جدًا خلال السنوات الأخيرة وبقينا نسمع عن مستريح المواشي اللي جمع ٤٥٥ مليون جنيه في محافظة قنا ومستريح الآثار وأخيرًا مستريح العقارات.
الحقيقة الذنب مش بس على المستريح اللي في الآخر بينصب على الناس مستغل طمعهم في الحصول على مكاسب كبيرة جدًا لكن كمان الناس اللي بتسيب فلوسها للنصابين عليها مسؤولية كبيرة.
مستريحين العقارات ظاهرة خطيرة جدًا تأثيرها مش بس مقتصر على الناس اللي بيتنصب عليها ولكن تأثيرها بيشوه سمعة قطاع العقارات اللي بيمثل جزء مهم من الاقتصاد المصري.
عشان كدا بطالب أي حد بيشتري أي وحدة عقارية بغض النظر عن نوعها أنه في الأول ، يسأل على الشركة ويشوف هل هي محل ثقة يتعاقد معاها ولا لأ، الأمر التاني لما يعرف أن الشركة دي محل ثقة يدور على الورق القانوني الخاص بالوحدة.
لازم المشتري ياخد كل ضماناته القانونية بخصوص وحدته اللي اشتراها بدم قلبه ، لأن العقار الناس بتبص له أنه خزينة للفلوس في الأيام الصعبة وبتحط فيه تحويشة عمرها.
وبخصوص النقطة الأخيرة دي احنا بنحاول في شركات العقارات الكبيرة أننا ناخد قرارات عن طريق غرفة التطوير العقاري ، دا غير عمل قائمة بأسماء الشركات المقيدة في الغرفة عشان نقول للناس الشركات دي مضمونة وشقاك مضمون عندها وفي حال وجود أي خلاف حقك القانوني مضمون.
وبشكل عملي أنا بصفتي عضو مجلس إدارة جمعية اتحاد مطوري القاهرة الجديدة والعاصمة الإدارية بدأت اتحرك في أننا نعمل قوائم بالشركات الجادة واللي ليها مصداقية ونتحرى عن كل الشركات لتحديد مدى مصداقيتها عشان المواطن ما يصبحش فريسة للنصابين والمحتالين.
والهدف من الإجراءات دي أننا بنحافظ على صورة النشاط وصورة الشركات المحترمة اللي العميل بيكون أغلى حاجة بتملكها وهو رأسمالها الحقيقي ونفس الوقت بنغربل السوق ودا السبب اللي بيخلينا نطالب بتفعيل الرقم القومي للعقارات.
كلنا النهارده في مجال العقارات بنفكر ازاى هنتصدي للمشكلة دي عشان نقدر نحافظ على اقتصادنا ??
#أحمد_أمين_مسعود