في مفاجأة هزّت جماهير القلعة الحمراء، كشف مقربون من مجلس إدارة النادي الأهلي أن الكابتن محمود الخطيب، رئيس النادي، يدرس بجدية التنحي عن منصبه خلال الفترة المقبلة، بعدما تزايدت معاناته الصحية في الأشهر الأخيرة، إلى جانب الضغوط الإدارية والجماهيرية الناتجة عن تراجع أداء الفريق الأول لكرة القدم.
- Advertisement -
وأكدت المصادر أن الخطيب، الذي خضع في وقت سابق لعدة جراحات دقيقة، شعر بأن ضغوط المنصب أصبحت تفوق قدرته الصحية، ما دفعه للتفكير في الانسحاب بهدوء، في وقت يسعى فيه كبار حكماء الأهلي ورموزه التاريخية لإقناعه بالتراجع عن القرار، مؤكدين أن وجوده على رأس الإدارة يعد عنصر استقرار للفريق والنادي ككل.
رسائل الخطيب الحاسمة للاعبين
ورغم الظروف التي يمر بها، حرص الخطيب على توجيه رسائل صريحة وحماسية للاعبي الفريق الأول خلال مران الخميس. فبدأ حديثه بتأكيد الثقة في الجهاز الفني:
“الكابتن وليد صلاح الدين والكابتن عماد النحاس وكل الطاقم الموجود، هما إخواتكم، وهما المسئولين مسئولية كاملة عن كل ما يخص الفريق الأول”.
وتابع بنبرة صارمة: “كرة القدم مش بالأسماء الكبيرة ولا التاريخ الشخصي، الكورة في الآخر رجولة وجدعنة، سبرينتات واحتكاك وانتماء. الكرة محتاجة عرق وتضحية كل ثانية في الملعب”.
الأهلي يصنع الأسماء
وأردف الخطيب أثناء حديثه من أرض ملعب مختار التتش: “إحنا واقفين دلوقتي على أرض واحد من أساطير النادي، مكان مرّ عليه عظماء كتير، كلهم نجوم ورجال بيمثلوا الأهلي بجد.. لكن كله راح. اللي بيفضل هو الأهلي”.
وأضاف: “اسم الأهلي هو اللي بيصنع الأسماء، مش العكس. اللي يلبس تيشيرت الأهلي لازم يعرف إنه بيلعب عشان الشعار مش عشان اسمه”.
عتاب وتحفيز
ولم يخفِ الخطيب استياءه من تراجع النتائج، قائلا: “الفترة اللي فاتت مش الأفضل، ومكنتش أتمنى أشوفها مع الجيل ده، لأنكم تقدروا تقدموا أكتر. الأهلي كيان وتاريخ ومبادئ، والتاريخ مش بيرحم، بيفتكر بس اللي مشي على الطريق الصح”.
واختتم كلمته برسالة أمل: “لازم نسأل نفسنا: ناويين نسيب إيه ورا؟ هنكمل بنفس الشكل؟ ولا هنفوق ونرجع الأهلي اللي الناس كلها بتحترمه وتخاف منه؟ أنا مؤمن إن فيكم رجالة.. ورجالة الأهلي بيبانوا وقت الشدة”.
التعليقات مغلقة.